குஜராத் மாநிலம் அகமதாபாத்தில் இருந்து சுமார் 80 கி.மீ. தொலைவில் சிந்து சமவெளி தொல்பொருள் ஆய்வு தளம் அமைந்துள்ளது. இங்கு ஆய்வு பணிகளை மேற்கொள்வதற்காக டெல்லி ஐ.ஐ.டி. மற்றும் காந்திநகர் ஐ.ஐ.டி.யைச் சேர்ந்த 4 பேர் கொண்ட குழுவினர் சென்றனர். அங்கு மாதிரிகளை சேகரிப்பதற்காக அங்குள்ள 10 அடி ஆழம் கொண்ட குழியில் அவர்கள் இறங்கியுள்ளனர். அப்போது எதிர்பாராத விதமாக மண் சரிவு ஏற்பட்டு 4 பேரும் மண்ணுக்கு அடியில் சிக்கிக் கொண்டனர்.
இதையடுத்து அங்கிருந்தவர்கள் உடனடியாக மண்ணை அப்புறப்படுத்தி உள்ளே இருந்தவர்களை மீட்கும் முயற்சியில் ஈடுபட்டனர். இதில் 3 பேர் பத்திரமாக மீட்கப்பட்ட நிலையில், சுரபி வர்மா(23) என்ற மாணவி சம்பவ இடத்திலேயே உயிரிழந்தார். மற்ற 3 பேரும் சிகிச்சைக்காக மருத்துவமனைக்கு அனுப்பி வைக்கப்பட்டனர். தொல்பொருள் ஆய்வு தளத்தில் மண் சரிவு ஏற்பட்டு ஒருவர் உயிரிழந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.
